常平1日遊（探訪阿拉）
我哋原本諗住3月2號搵阿拉拜年嘅，但係因為佢事先有約，因此改到噚日2016年3月16日至成行囉。冇所謂啦，開講都有話有心唔怕遲，十月都係拜年時嘛。
大哥、我、阿棠、秀雯、阿龍、阿賢、阿添（吓，阿添？係呀，阿添呀，好賞面喎，第一次出場，聽講第二日17號一早仲要到尖沙咀返新工添喎，原來佢想睇下六叔間豪宅。阿添，努力加油，希望我哋亦都好快有機會去睇下你間豪宅啊！）
我哋一行7人乘搭位於砵蘭街嘅環島旅運10點嗰班車直奔常平。做生意都係孭住個算盤嘅，車票註明"香港段不設座號"原因係由香港到深圳灣段嘅乘客 （例如：香港往常平、香港往東莞、香港往新會等等......，都同坐一架車，過關後再轉搭另一架專往目的地嘅巴士，咁就慳番啲成本啦，好吖！）。閒日乘客唔多，一架車都坐唔滿。
一如阿拉所料，由開車到常平站需時2個小時15分左右。到達常平剛好係12:16分。
阿賢用緊聯通HK$78嘅一卡兩號3G月費計畫，可以用 HK$0.50一分鐘喺大陸打電話，如果好用我都想轉用，因為依家嘅2G月費計畫成日都冇訊號，吹脹。於是由佢打電話畀阿拉，原來阿拉已經喺美怡登酒店中餐廳開咗枱等我哋。間酒店中餐廳有免費wifi，阿拉話仲可以上埋面書（Facebook）添。飽餐一頓後（唔平啊，食咗4xx幾蚊人民幣呀，秀雯阿賢埋單，多謝多謝！）就梗係去阿拉度啦。因為8個人一次坐唔晒一架車，大哥、阿棠、秀雯等先坐第一架車，我、阿龍、阿賢、阿添就趁機去影碟舖買碟。我嘅目標原本係買番啲3D藍光碟嚟睇下門口嘅，啲3D藍光碟賣35到45蚊人民幣，正版就要1、2百，2、3百不等，而普通2D藍光碟就賣12蚊人民幣，所以唔貴。 但係發覺選擇就真係唔多，一係我已經下載咗又或者我唔鍾意，所以買唔成。都係阿龍好嘢，係咁意都買咗百零蚊.....
下面嘅視頻(0:11分鐘
1.18MB) 可以旋轉及放大睇啊。↓
飯後甜品紅棗糕↓
返到阿拉屋企阿龍第一時間就梗係試下佢啲演唱會碟啦，期間我哋就巡視一下四周嘅環境。第一個發現就係比上次起多咗幾棟新樓同埋會所。嗯.....好唔好掃番幾個單位呢？下次六合彩開獎後講畀你哋聽。
下面嘅視頻(0:18分鐘
1.91MB) 可以旋轉及放大睇啊。↓
新落成嘅會所↓
阿拉屋企有wifi，佢用緊嘅中國移動手機服務計畫又真係幾鬼抵用：128蚊人民幣一個月，包420分鐘通話同埋3GB數據、4G手機上網同埋屋企 wifi上網。諗下諗下我依家淨係畀8MB嘅龜速寬頻上網每個月都要HK$268，比起真係好鬼貴同慢囉，李"賊"楷條友先係用張紙換咗我啲錢，繼而收我 天價嘅上網費，咁鬼多錢仲咁做真係冇天理呀.....
大哥就喺依個時候發揮佢照顧兄弟嘅潛能嘞，原來佢帶埋個專用吸塵機嚟同阿拉除螨，出錢出力。歐陽家依個照顧兄弟姊妹嘅優良傳統值得我哋重視和延續啊。
然後我哋就睇周星馳嗰套收咗30幾億人民幣破晒記錄嘅"美人魚"嘞。可能因為係國語版（周星馳啲無厘頭戲係要聽番廣東話至傳神嘅嘛），而且音質差（好似喺戲院盜錄咁有好多雜音），畫面質素亦只一般，個人感覺就係"吓.....咁就收30幾億嘅嗱"囉。
噚日嘅天氣都有啲凍，個飯廳同客廳兩邊扯風，再加埋磚地板我哋又冇著鞋，於是阿拉開咗暖氣畀我哋嘆，當堂舒服晒。
下午茶時間身為主人家嘅阿拉梗係要我哋賓至如歸啦，冇咖啡因嘅咖啡、熱烘烘嘅波羅飽同埋法飽、自製蒜蓉牛油果醬、名貴嘅Godiva曲奇餅相繼出場，大家亦都唔客氣同佢清倉。
然後阿拉拎出佢嘅音樂影碟畀大家欣賞，依啲係佢同阿龍嘅強項，我就只能夠間唔中賣魚頭「搭嘴」。
噴咗一輪口水後，六點半左右我哋就去食晚飯嘞。因為8個人，阿拉就叫咗一個酒店相熟司機，分2架車車我哋去飯堂 - 會龍居嘞（次次都係嚟依度仲唔係飯堂？）
食咗乜？依啲囉↓
客家釀豆腐
豉油鴨
炸魚片
鐵板爆生腸
雲耳炒密豆
上湯菜心
燒雞
焗魚腸
糖不甩（送嘅）
又係食咗4xx幾蚊人民幣，大家都話抵過晏晝果餐囉。又係秀雯同埋阿賢畀，點係呀，多謝多謝！
食完飯阿拉同個司機就車我哋去火車站搭火車。班車開21:09，返到香港大概11:10，快小小，但係就要行一大段路轉車囉，有得揀我都係揀搭巴士 舒服啲。順帶一提，過關前喺阿賢相熟嘅舖頭買多一支上海出產嘅皮康王，開價8蚊還價7蚊成交。今日前後買咗3支咁多做乜呀？有類固醇喎。知嘞，會小心用嘅嘞，不過又真係幾有效嘅。
皮康王↓
講開又講，幾時去阿拉果度BBQ啫？弊，畀阿拉知道添.............
備註：相片/視頻由秀雯提供，不敢叨光。
