資料來源：黎梅耀
日期：2017年3月1日 晚(星期三)
今晚喺阿龍屋企食飯，食乜？Pizza、腸仔天使麵、雞腳紅蘿蔔湯囉。
$170兩個鬆厚大批 - 至尊 + 意式風情
食完飯，諗住去界限街室內體育館外面兜過圈散吓步幫助消化啦，點知就撞到黎生坐喺長櫈度。同佢打個招呼後，忽然心血來潮想去問佢一啲關於阿爸阿媽嘅往事。今時今日，除咗佢，我都諗唔到仲有邊個可以講依啲嘢畀我聽囉。阿姨唔知仲記唔記得呢？唉，今年飲茶拜年佢連秀雯都唔記得囉，就算記得，都唔會係依啲嘢啦。
唔講唔知，原來阿爸仲大佢3歲，如果阿爸在生，今年就係93歲(1924年)，佢即係90歲，以依個年紀，佢嘅思路同埋健康真係唔錯嘞。
以下係同佢嘅對話，佢知道我錄音，因為一來我驚老人癡呆唔記得，二來我想畀你哋分享，不過事後諗起，咁樣做係唔係有啲唐突呢？佢點諗就唔知嘞，乜解究依條友錄我音呢？哈哈！
全段錄音長約30分鐘，冇剪輯，只有降噪及調整音量。我把它分成3段方便參考，每段約10分鐘。
第一段：(10:13分鐘)
1. 佢話1940年(又話1945年)入佢舅父開嘅英信銀號打工(唔係文信)。澳門英信喺十月初五街，香港英信就喺中環文咸東街，香港重光係1945年，佢15歲(又話16歲)入英信，當時阿爸已經喺英信，咁即係阿爸未夠廿歲就喺英信打工啦。喺網上搵唔到有關英信銀號嘅資料，反而搵到佢哋發出嘅5両庄99%金條圖片：
2. 阿爸嘅親大佬，即係我哋嘅大伯(應該係歐陽可鈺，社華、文尉嘅阿爸)原來亦都喺英信打過工。
3. 阿媽原來喺澳門六國飯店做過，黎生仲話佢係媒人添，六國飯店同英信都係喺十月初五街，阿爸就係喺嗰度識阿媽嘅。
十月初五街行去大三巴牌坊大概6分鐘
昔日嘅澳門六國飯店，好似係1990年結業
澳門六國飯店底層
澳門六國飯店二樓。佢哋坐過邊張檯呢？
有機會再到澳門嘅話，真係要到此一遊，懷緬一下呀......
第二段：(09:54分鐘)
1. 我哋大概1946年左右移居香港中環閣麟街，大哥喺嗰度出世㗎
193X年嘅麟閣街
2. 佢話萬成原本冇預阿爸一份，只有佢同祥叔(即順叔嘅阿爸)。有一日黎生同祥叔去蘇屋村保安道貨倉搵佢哋嘅親戚，然後一齊去九龍灣垃圾池搵肥婆四介紹佢哋做收買廢鐵，點知後來阿爸都嚟埋。
佢話可能阿爸(當時失業)去尚未交吉嘅英信文咸東街貨倉搵佢，看更就同阿爸講佢同祥叔去咗蘇屋村保安道貨倉啦。
3. 英信喺廣州、上海、廣州灣有聯繫，而且當時仲跟恒生齊名添，後來共產黨掌權變咗無得做，因此結業，真係好可惜，乜都整定啦......
第三段：
1. 1952、53、54年佢哋喺九龍灣垃圾池挨咗3年，當時請人只需3蚊一日(包一餐)。嗰時應該係我哋最艱難嘅日子，我哋亦應該喺嗰時搬到九龍茶果嶺住。
我哋就係住喺茶果嶺依啲地方嘞
2. 1954年搬到蘇屋村保安道開始萬成。佢畀咗1千蚊黎達成(音譯，祥叔係黎達成嘅姐夫)買咗個倉。
時間飛逝，往事如煙，眨下眼我都就嚟68歲啦！
沒有留言:
張貼留言