家族2016新年聚會

早前阿龍抽獎抽到一張加太賀嘅原條三文魚贈劵。叨佢嘅光，我哋：大哥、二哥、我、阿龍、阿賢、阿拉、阿添、Ronny一共8人，於2016年2月16日晚到位於紅磡嘅加太賀日本料理品嘗，(加太賀位置↓)

也算係一個家族新年聚會吧。原本阿棠同秀雯亦應該出席嘅，可惜佢哋兩個都咁啱一齊唔舒服唔嚟得，有啲美中不足囉。

大哥、二哥、我三個有長者乘車優惠，每人2蚊乘坐12A巴士前往。我哋7:15分左右到達，早咗15分鐘，啱啱同阿龍一家人喺加太賀街口碰面。阿拉則因為要檢查牙齒，畀我哋遲十分鐘左右正到。

第一次到加太賀，它位於一條小巷，但係布置就幾有日本feel，↓

亞龍同佢哋嘅老闆頗為相熟，band友啩，話畀我哋聽如果多年前到此幫襯，等上2~3個鐘係等閒事，當時佢哋旺到要另外租個舖位安置輪候嘅 客人，真係誇張。依張2001年5月4日嘅蘋果日報話當時這間嘢每晚派籌千張，唔係嘛？仲講佢哋由1間舖做到14間，依個老闆唔簡單喎！↓

下面嘅視頻(0:55分鐘 8.61MB)  係睇阿龍以前嘅表演同埋睇佢哋嘅演唱會廳房，唔係好大。唔該留意下我哋阿龍都唔係嘢小，嗰到貼有佢幾張演出相片，好多人都龍哥前，龍哥後咁稱呼佢。↓

開band嘅廳房，就係咁大囉↓

入到用晚飯嘅廳房冇耐，侍應就捧上一條三文魚畀我哋影相留念。我哋食嘅唔係依一條，因為做刺身同鹽燒頭尾需時，依條係道具嚟咋。↓

依碟係小食嚟嘅↓

燈登燈凳...主角出場嘞↓

先講重量，店舖話一條三文魚大概有80塊，但估計我哋依條應該有120塊左右，都算足秤喇。質量方面，我個人覺得唔錯，新鮮、正！滿意囉。8個人因為仲有其他餸菜，因此，有20塊左右分成兩份打包。二哥，阿龍一人一份拎返屋企宵夜。小二子梗係要掛住老佛爺啦。

第2道菜 - 天婦羅大蝦8隻，原本我唔食，但係阿賢話正呀，間唔中食下冇所謂啦。試過覺得都OK，勝在新鮮↓

第3道菜 - 串燒日本牛脷6大塊。膽固醇高我冇食，6大塊夠晒矜貴。↓

第4道菜 - 京都照燒牛肋骨。我覺得有啲"騷"，但係阿添就話牛肉係咁味嘅。↓

第5道菜 - 天婦羅番薯。我同阿賢一人半塊，一般啦。↓

第6道菜 - 海陸空拉麵，睇下比例就可以知道個碗有幾大，成個盤咁，駛唔駛咁誇張呀！係個碗大者，我地8個人都食得晒↓




第7道菜 - 炒雜菜↓

第8道菜 - 鹽燒三文魚頭尾。阿龍嘅摯愛，佢話已經連續食咗3晚。新世紀一田差唔多收市時抵食，賣得好平喎。↓

原本阿龍仲想叫個加太賀首創嘅花之戀，但係因為食到依度大家都飽晒所以冇叫到↓

鹽燒三文魚頭尾都仲要打包。二哥和我一人一份，又食又拎。

最後送上甜品雪糕糯米磁，大家都幾鍾意喎。↓

臨走前梗係要嚟個大合照啦！↓

當晚菜單：
三文魚刺身 $1500
鹽燒三文魚頭尾
天婦羅大蝦8隻 $120
串燒日本牛脷6大塊 $62
京都照燒牛肋骨 $188
天婦羅番薯 $54
海陸空拉麵 $198
炒雜菜 $58
Total: $680

阿拉爭住請，我哋梗係唔敢同佢爭啦，多謝多謝！好似$790吧，如果計埋三文魚($1,500)同埋阿龍有9折優待在內，計起嚟每人就大概$300，貴唔貴、值唔值就見仁見智嘞。不過，如果唔駛錢，咁就最好快的返單，嚟多幾次囉，多謝多謝！哈哈哈！

後記：

阿拉補傳來加太賀嘅收據：↓

原來三文魚刺身係送嘅，但係鹽燒三文魚頭尾骨就要加收$100。冇偈啦，你叫片皮鴨一客二食都要加錢啦。