港鐵股東周年大會

今日去同馬時亨開會，佢要向我匯報...... 唔駛擘大對眼喎，我話去開港鐵股東周年大會咋，哈哈！

唔講你哋唔知，買咗40幾年股票，依次係我第一次參加股東周年大會咋。為乜依次咁熱心呢？且聽我慢慢道來......

衰嘅原因：因為聽人講得多，參加依啲會有得食又有得拎㗎，衰貪心囉

唔衰嘅原因：因為都係想去見識下嘅

其實我依個股東好失禮，揸住1,136股咁大把，名副其實嘅小股東也。但係唔好睇小佢呀，佢係我有史以來最賺錢嘅股票嚟㗎。股票喺2000年10月5日以港幣9.38嘅上市價用白表投番嚟嘅，到今日2017年5月17日嘅價錢係港幣49.10。我係唔係好叻呢，但係如果同你哋講我依家仲有90幾蚊嘅匯豐(現價港幣68.70)同埋廿幾蚊嘅電訊盈科(現價港幣4.51)果陣就會同我相對無言，然後講原來你真係好叻喎...... 哈哈！唔怕，二嫂嘅師傅話齋，實行同佢鬥長命。

股東周年大會喺九龍灣國際展貿中心6樓舉行，時間係11:30。

因為驚唔熟路同埋又驚辦手續需時，總之依家心血少，乜都驚餐懵。倒塔咁早(9:55)就起程。從太子到九龍灣搭地鐵大概20分鐘，A出口，按指示朝九龍灣國際展貿中心方向走，上2部扶手電梯，然後沿德福商場步行大概6分鐘到車站乘搭免費穿梭巴士(MegaBox同埋EMax九展都係喺依度搭嘅。)

去到車站已經有人排隊，但係亦見到幾架巴士等緊上客，所以陣間就上到車嘞，車程大概6分鐘。10點半左右就到咗九龍灣國際展貿中心嘞。

搭笠上6樓，原來有唔少人已經到咗。之前已經問過，持有實股(即股票持有人以本人為名) 嘅投資者可以憑身份證就可以登記進場。出咗笠果然見到好多工作人員、保安等熱誠招呼，其實進入九龍灣國際展貿中心就已經見到佢哋，初初仲以為乜誰嚟咗添。工作人員引領我到負責登記嘅同事(有十幾二十個)辦理登記。畀個身份證佢，佢用電腦核對資料，1~2分鐘就搞掂。跟住佢就畀我一個電子投票機、一張電子投票機使用說明單張、一張火警疏散圖同埋一個環保袋。

然後工作人員就教我點樣用個電子投票機，撳1就贊成，撳2就反對，唔撳就棄權，好簡單。撳中間個藍色鍵仲顯示埋我嘅名同埋持股量添。

因為仲未夠鐘，工作人員就先帶我哋進入一個較細嘅會議室等候。

11點鬆啲，工作人員就引領我哋進場。會場大約可以容納1千個人，11:30就見到馬時亨等董事局及相關高層就位。馬仔亨首先發言，用咗大約半個鐘做工作匯報。期間不斷有投資者進入會場(睇嚟依啲都係老雀囉，咁早嚟真係倒塔咩)，到最後整個會場坐無虛席，大會仲話要開多2個有電視直播嘅房畀啲人坐添。

到開始動議時，我諗卒之有機會用下個電子投票機啦，點知原來真係有唔少人咁鍾意發問嘅，對最後我仲見到要排隊發問添，唉！到依家我先明白點解馬仔亨先前話要中斷一啲無關痛癢嘅提問嘞，佢話唔好嘥大家嘅時間嘛。

有興趣就睇下2017年港鐵股東大會嘅網上視訊啦(股東提問大概由35:36開始。)

卒之，我見到有啲人開始陸續離開。我見唔對路12:40左右都跟住排隊走人。畀番個電子投票機，換咗一個小盒，內有一份曲奇餅、一個紙包檸檬茶。

返到屋企，喺門口撞到對面B座嘅退休老師，同佢講開，佢話港鐵真係孤寒咗啲 (唔怪得佢唔去啦，佢原來都有揸港鐵股票㗎) ，佢仲話廖創興銀行就闊佬啲，一張100蚊嘅奇華餅劵，再加2張50蚊嘅其他餅劵，最近幾年都係咁。

算啦，總算都叫做見識過嘞......