帝京酒店花月庭自助午餐

今日係2015年3月3日，家族成員：二哥、二嫂、我、阿棠、秀雯、阿龍、阿賢、阿拉一行八人參加咗帝京酒店花月庭嘅自助午餐。

時間過得真快，轉眼間，家族八人都年過55，符合佢哋嘅長者優惠條件 - 每位盛惠HKD165連加一服務費 (即係HKD150+HKD15)。哈哈!

頭條日報優惠劵

自助午餐原價(星期一至五)係HKD295(成人) / HKD225(長者65歲或以上) 再加一：

花月庭自助午餐海報

即係就算有恆生信用卡享有75折都要HKD250.75，如果冇就要HKD324.50
二哥和我兩個耆英如果有恆生信用卡就HKD191.25，冇就HKD247.50

各人都覺得難得有此機會，既可聚會又可飽吃一頓，大家都踴躍參加。

二哥二嫂最準時，未到十二點已經喺門口，點解唔入去先呢？原來要憑電話號碼入座，依家大多數人都將電話號碼放喺電話記憶裡面嘅啦，鬼記得我個電話咩。

入到裡面，第一個印象就係全部裝修過，同以前唔同，擺食物嘅地方多咗。嘩！真係好耐冇嚟過囉，冇計啦，依家咁貴。

花月庭內部

可能因為攪推廣嘅關係，照我睇就算唔係全部爆棚都起碼有九成半以上囉。我哋安排喺差唔多最入邊嘅315號檯。

雖然我哋畀HKD165啫，有啲唔計較嘅人係要畀足HKD324.50嘅嘛，所以啲食物一啲都唔差唔少，亦頗有水準及衛生。三文魚刺身、生蠔、燒牛肉Haagen-Dazs雪糕樣樣都有供應。

燒牛肉、火腿交替供應。不過，始終都係燒牛肉受歡迎，火腿就少人問津。梗係啦，鞋烚烚，有得揀我都唔揀啦！

一個負責即時開蠔，一個負責即時清洗。畀人新鮮、衛生嘅感覺。

阿龍阿賢話正最捧場，兩人食咗十幾隻，我自認腸胃差，食咗2隻就夠皮(每人每次限攞兩隻)。

雪糕可以再加鮮乳酪或伴以各式各樣嘅雪糕配料。

自助餐由12:00到2:30，差唔多2:30阿拉就話要趕住返常平。走之前梗係要影番張大合照啦。

三個賢內助喺我出去攞嘢食嘅時候搶住埋咗單，真係唔好意思兼多謝！

以HKD165食依個HKD324.50自助餐，差唔多等於大人買半飛，算低囉，仲想點！