2019年2月26日 星期二
萬宜水庫東西壩遊記
今日係2019年2月24日(星期日)，天氣唔冷唔熱，冇太陽，適合我啲老嘢遠足。於是決定將做咗幾日功課嘅"如何遊覽西貢萬宜水庫東西壩"付諸實行。
行程安排係：
去程
1. 搭地鐵從太子站前往鑽石山站
2. 搭九巴96R (需時約50分鐘)從鑽石山站前往西貢上窯站
3. 從上窯站步行遊覽萬宜水庫東西壩(全程約2.13小時，見下圖)
4. 遊覽東西壩啦、驚住行錯路啦、行得慢啦(預算2.5小時)
回程
1. 萬宜水庫(東壩)搭新界專線小巴9A 前往西貢北潭涌巴士站(約20分鐘)
2. 北潭涌巴士站搭九巴96R前往鑽石山站
3. 鑽石山站搭地鐵返太子站
因為
1. 依條路線我未行過
2. 步行預算約5小時(真係擔心自己頂唔頂得蒲)
3. 好似我咁嘅自由行，依家仲話有新界19坐位專線小巴由萬宜水庫往/返北潭涌啫，以前就一定要坐的士入去，可能係因為環保關係啦。但係小巴只行走下午時段，過咗時間或者多人搭上唔到車，就一定要同人爭搭的士或者原路行返出嚟。九巴96R配9A小巴只喺星期日同埋假期行走，網上資料顯示9A小巴由下晝15:00至18:00行走，20至25分鐘一班車，只得兩架車，有數得計，三個鐘頭左右只可以載走唔夠二百人？
3. 好似我咁嘅自由行，依家仲話有新界19坐位專線小巴由萬宜水庫往/返北潭涌啫，以前就一定要坐的士入去，可能係因為環保關係啦。但係小巴只行走下午時段，過咗時間或者多人搭上唔到車，就一定要同人爭搭的士或者原路行返出嚟。九巴96R配9A小巴只喺星期日同埋假期行走，網上資料顯示9A小巴由下晝15:00至18:00行走，20至25分鐘一班車，只得兩架車，有數得計，三個鐘頭左右只可以載走唔夠二百人？
初初真係驚依樣，驚個樣，因此喺Whatsapp發佈我嘅Google Map實時位置，等你哋救命(人對未知事物產生恐懼好正常啫 )。事後發現全程石屎車路，冇乜分岔路口，沿途有唔少"同道中人"同行，遊覽人數並唔算多，小巴亦唔止2架，尾班車去到幾點就唔知嘞；但係事前鬼知咩，咪用打破自己嘅步行速度，以平均時速4.4公里行完9公里路囉，驚死搭唔到車嘛。
地鐵鑽石山站C出口，然後C2方向出站。↓
出站後轉左到巴士總站搭96R。↓
巴士喺鑽石山站10:50開出，嚟到行程起點上窯站係11:34，即係用咗44分鐘。回程站喺馬路對面，車尾方向，可以見到。↓
落咗車沿車頭方向行，見到依個分岔路口就向前(麥理浩徑)行。↓
"萬宜水庫鐘形虹吸溢洪道"，水位嚟到溢洪道就會被吸走。遠處就係西壩啦。↓
1978年11月27日由前港督麥理浩主持萬宜水庫揭幕。紀念碑後面開始出現水庫陀地"黃牛黨"。此後有大約20-30隻牛大哥喺唔同路段出現，人車都要畀面讓路。↓
沿途不時見到有綠的進出水庫，進入水庫嘅都有乘客，駛出嘅就有啲有，有啲冇。↓
到咗西壩喇，時間係12:26。↓
遠處就係東壩喇，唔好開心住，仲有排行㗎。你哋冇睇第一張地圖咩，由起點到西壩係4公里，需時56分鐘，由西壩到東壩反而要5.1公里，需時77分鐘㗎。↓
登登登凳......到終點萬宜水庫東壩嘞。時間係14:13，即係一共行咗2個鐘頭39分鐘，Google
Map話2個鐘頭13分鐘係唔計休息、影相、欣賞風景㗎......↓
其實要睇嘅唔係萬宜水庫，而係①1.4公里嘅萬宜地質步道，同埋②防波堤，③破邊洲(見下圖)。
遊覽來回2.8公里嘅萬宜地質步道需要幾耐？下面地圖表示2個鐘，我就1個鐘左右搞掂，睇你行得快或慢，同埋欣賞景點時間囉。
破邊洲嘅六角形岩柱氣勢磅礡，非常奇特壯觀(見下圖，網上照片)。藍色錨形紀念石右手邊有條樓梯, 就係上去花山近望破邊洲嘅。但係此路比較難行，所以我只係遠望就算嘞。
遊覽景點包括：六角形岩柱、S形岩柱、海蝕洞、雙T形錨型石、遊客鍾意跳入去影相嘅地鼠洞......↓
六角形岩柱。↓
S形岩柱。↓
海蝕洞。↓
雙T形錨型石。↓
遊客鍾意跳入去影相嘅地鼠洞......↓
呢個牌教你如何叫紅的、綠的同埋法定收費。但係，如果知道你冇其他選擇而個天又越嚟越黑，有冇的士佬肯按錶收費就唔知嘞。↓
9A小巴行車時間及收費表。↓
15:25上咗依架小巴前往北潭涌站，大概20分鐘行車時間。↓
連埋我在內大概8個客左右，跟住就開車嘞。途中都見到1架對頭9A小巴，加埋我睇住佢開嘅1架，即係起碼有3架啦。↓
16:01：(9A小巴北潭涌站隔離) 上咗依班96R巴士返歸囉。睇清楚"往黃石碼頭站"同埋"往鑽石山站"，唔好上錯車呀，兩個站就喺隔離咋。↓
空氣清新，環境優美，又有世界級六角形岩柱睇，正啦！👍
10蚊玩咗成日，抵啦！👍哈哈......
去程：
地鐵太子站往鑽石山站：$2
地鐵太子站往鑽石山站：$2
96R往上窯站：$2
回程：
回程：
9A專線小巴往北潭涌站：$2
96R往鑽石山站：$2
地鐵彩虹站往太子站$2
2019年2月16日 星期六
龍脊遊
今日係2019年2月15日(星期五)，趁住冇乜太陽，氣溫亦適中，決定前往龍脊遊覽。龍脊係好多人到香港遠足嘅首選，曾獲旅遊指南《孤獨星球》選為"香港最佳遠足路線"之一，亦係CNN旅遊網站推薦嘅"香港島五條新手遠足路線"之一！
地區：香港島南區
起點：石澳道近土地灣村
終點：大浪灣
行程：4小時
長度：約8.5公里
難度：普通
除咗馬塘坳至大浪灣村一段外，多數路段冇遮蔭(依個就係我選擇冇乜太陽至去嘅原因)。登上打爛埕頂山沿途有碎石，須特別留意；由馬塘坳到大浪灣要往下走約千級石階。
搭地鐵(亦可選擇搭102隧道巴士到筲箕灣巴士總站)從太子站出發前往筲箕灣地鐵站，A3出口，就係筲箕灣巴士總站，然後轉搭城巴9號線前往龍脊起點 - 土地灣。當日係閒日，星期五，但係可能因為巴士班次唔係好密，十多分鐘一班車，因此唔少人等車，同埋企位都肯搭。↓
大概15~20分鐘車程就到達土地灣，大批乘客落車(冇三份一都有四份一)，因此唔識路跟大隊都唔駛驚蕩失路。車站對面就係前往"龍脊"入口。睇下個鐘，13:32。
因為要到山徑後段先至有廁所，有需要就把握機會先幫襯依度嗰啲流動廁所嘞。
此次旅程簡介：路線起點係石澳道近土地灣村嘅港島徑第八段，由打爛埕頂山至雲枕山嘅一段山徑(見後面介紹)如騰飛嘅龍背般高低起伏，「龍脊」由此而來，終點係大浪灣。聞說往大浪灣段並唔係咁好行，因此選擇喺大潭峽(歌連臣山)段散band，橫掂打卡景點"龍脊"已經行過啦。我選擇嘅旅程用咗2小時15分鐘。
大概5分鐘，往左看就會睇到大潭灣入面嘅大潭港同埋紅山半島嘞。
再多走10分鐘，就到一個涼亭及分岔口，去"龍脊"就要往上行。
由起點不到半小時，就會嚟到打卡嘅平台嘞，第一次嚟梗係唔知埞啦，石澳村、大頭洲、五分洲、東龍島統統都係喺網上搵到嘅(網上照片)。
喺依度認低威都要講下，早前喺網上睇到下面張照片，係喺打卡平台嘅右手方向。以為跟住依個方向繼續上山實冇錯啦，行行下發現點解自己變咗"前無古人，後無來者"嘅，回頭睇下啲人龍全部都向左行，立即轉軚跟返大隊，如果唔係你哋就要80日後先至可以見番我嘞😓。
打卡平台往左望就會見到打爛埕頂山嘞，個名邊個改㗎，咁怪嘅？你哋話似唔似"龍脊" - 龍嘅背脊呀？山巒起伏嘛，再加啲想像力咪十足十囉。↓
打爛埕頂山......↓
從打爛埕頂山望出去...... 石澳鄉村俱樂部、大浪灣、東龍島、遠處就係清水灣鄉村俱樂部、大廟、將軍澳......
標記指示往左去土地灣，往右去大潭峽，我揀咗往右行。依段路大概要行1個鐘，大多係平路，但就冇乜風景睇嘞，都係山路，沿途好多樹根嘅山路。
依度嘅標記指示往左去大潭峽，往右去大浪灣，我揀咗往左行返歸嘞，因為依段路聽講仲要行成個鐘兼且唔係咁好行，"......由馬塘坳到大浪灣要往下走約千級石階？......"聽到都驚。
唔駛10分鐘就嚟到依度，落咗樓梯就到巴士站嘞......
前往筲箕灣嘅9號巴士站喺馬路斜對面㗎。
後記：如果有三條山路畀我揀，1.大棠山，2.經香港大學上山頂，3.龍脊，我寧願揀前二者，理由係石屎路比較好行。龍脊嘅石級好多係長短高低不一，又唔平，兼且仲夾有大小不一嘅碎石，平路斜路都係咁，對於唔行慣山路嘅我確實比較難行，仲要加倍小心，你估仲十八廿二咩。
不過，如果依家有人問我去過龍脊未，我會話：去過啦！哈哈。
2019年2月14日 星期四
慈山寺遊記
禧哥嘅外父從中聯辦攞到5張參觀慈山寺名額(參學證)，阿棠同秀雯就叫我哋一齊參觀。大哥因為有啲感冒，未能前往，二哥挨義氣頂上。於是，二哥、我、阿棠、秀雯、阿賢一行五人便於2016年2月22日星期一前往參觀。如果想到慈山寺，可以上網或電話預約，最多可預約6人，包括預約者本人。
慈山寺每日限400人免費參觀，目的喺要"保持寺廟清幽"，依個就係點解寺內人流疏落嘅原因，難怪有人喺網上嘈話預約咗幾日都唔成功啦。
我同阿賢於9:20左右到達大埔墟火車站，然後連同二哥、阿棠秀雯乘搭的士前往，剛好60蚊，秀雯爭住畀錢。↓
依間就係李嘉誠從佢嘅基金會捐咗17億港元興建嘅慈山寺嘞，佔地50萬平方呎，背靠八仙嶺，面向船灣淡水湖。(慈山寺遠景)
天公造美，天氣預報話有雨落但係冇落，氣溫亦唔凍，好適合遊寺，正！(慈山寺入口)。↓
入寺係唔需要門劵嘅，但就需要出示預約號碼，即係冇預約就唔入得寺啦。保安哥哥手拿平板電腦核對訪客嘅資料，夠晒保安同埋先進啦。
進寺後留影
然後由專人引領我哋進入接待處。
接待人員派發參學證畀我哋，每人一張。↓
我哋睇咗一場10:00鐘開始嘅3D電影，片長大約7~8分鐘。我就有"吓！睇完嗱"嘅感覺；二哥就話水準只係一般，好似仲唔及我屋企嘅3D電影喎。(3D電影室)↓
用青銅鑄造嘅巨型白衣觀音像76米高（約23層樓），手執摩尼珠(又稱如意寶珠)及靜瓶，立於三層高蓮花臺上，全球第二高，同樣由鑄造天壇大佛嘅南京航太晨光公司承造。聽講像內供奉佛舍利喎(網上有說佛舍利供奉喺大雄寶殿內)↓
在觀音像下，我哋學人繞佛一周，然後就遇到導賞員定邦指正我哋。繞佛原來係要順時針方向嘅，我哋梗係乖乖哋行番正道啦。
我問佢有關李嘉誠禪修獨立屋嘅事，佢話梗係冇咁嘅事啦，獨立屋係嚟畀來訪嘅重要人物例如政要、高僧用嘅。↓
睇咗依段片，誰是誰非唔該自己分析。
然後佢帶領我哋到大雄寶殿，上樓梯時佢要我哋留意一下。上到大殿時佢問我哋有乜感覺.....原來石階係有高有低嘅 (當然差別唔係好大啦)。阿賢話講開真係有啲感覺，因為佢腳痛，所以感覺到，咁都畀佢叻番次。
大雄寶殿供奉釋迦牟尼佛(中：現在佛)、阿彌陀佛 (右：未來佛，西方極樂世界)，藥師佛(左：過去佛，東方淨琉璃世界)。
兩側是18羅漢
後殿就有從敦煌莫高窟以精密儀器拍攝，複製出嘅「彌勒經變」、「文殊經變」和「普賢經變」嘅壁畫。同埋(二哥左手嘅長台)陳列咗國學大師饒宗頤嘅墨寶《心經》。↓
喺大雄寶殿同埋普門之間，栽有菩提聖樹，由斯裡蘭卡總統於2012年所贈。係由釋迦牟尼覺悟嘅菩提樹，由佛教聖地菩提迦耶分枝到斯裡蘭卡，成為第二代聖樹，如今再分枝送到慈山寺，是為第三代聖樹。
阿賢問菩提會不會結葡萄的。依方面我搵咗啲資料：
"菩提"係梵文bodhi嘅音譯，意指覺悟，菩提樹即覺悟樹，因為釋迦牟尼坐係依棵樹下成佛，覺悟了宇宙人生真理，所以叫做菩提樹。
依棵就係菩提聖樹嘞，相傳由最早嘅印度菩提樹分枝，阿育王嘅女兒乘船到斯裡蘭卡栽種。
喺菩提聖樹同埋普門嘅前方係洛迦池，池中噴水向外散發出一個一個水波，寓意弘揚佛法。↓
然後佢就帶我哋去普門抄經嘞。抄嘅係260(多)字唐三藏玄奘法師（西元649年）漢譯本嘅般若波羅蜜多心經，抄寫時間大概30~45分鐘。↓
起初我都好細心抄嘅，後來就越抄越快，點解？身在經堂，心在齋堂囉。掛住12點免費派發的齋飽，擔心遲咗冇得食.....
我"國學大輸"嘅墨寶😁↓
抄經比賽結果係：二哥(冠軍，估唔到吧)，秀雯(亞軍，大熱倒灶)，老三(估唔到抄經都係做老三)。影番張畢業相先.....
一啲有關般若波羅蜜多心經嘅資料：
梵文（英文Sanskrit）係印度經典語文
"波羅蜜多"嘅意思係：至彼岸
所以，般若波羅蜜多心經嘅意思就係運用大智慧度到達解脫彼岸嘅心經。
般若波羅蜜多心經 (粵語讀誦)
有齋自助餐食，不過唔係畀啲訪客食嘅，只供寺內僧侶職工食。有錢都冇用。
冇齋自助餐食，唯有食齋(叉燒)飽啦，到差唔多12:30才派發，味道唔錯喎。
攞多個都畀.....
本來到下午1:30左右有茶同埋咖啡供應嘅，但係我哋就選擇出番大埔墟醫肚囉。
睇嚟啲飲品都唔差喎，latte喎，二哥，阿棠有冇嘆走寶呀？
由慈山寺往大埔墟有16座位專線小巴行走，票價係$6.90，長者價係$2.00。因人流唔多，所以班次唔算密。↓
出到大埔墟大概1:45左右，然後到新達廣場嘅海港酒家飲茶。等咗大概40分鐘兼且冇下午茶優惠，要過埋當日(元宵節)至有。
個人感覺慈山寺環境整潔清靜，管理到位，未去過都值得一去。講開又講，喺咁好嘅環境下，帶髮修行，有食無工，一日三餐，剩係敲經念佛我諗我都做得嚟喎。
多謝阿棠、秀雯禧哥同埋佢外父啦。如果再有筍嘢，記住益下我哋呀，哈哈哈！
訂閱：
文章 (Atom)