港珠澳大橋半天遊 (1)

港珠澳大橋半天遊  (補充及再整理)          20181026 (星期五)

忽然間心血來潮決定要去試下港珠澳大橋，單身寡佬有依個好處，話行就行，幾瀟灑，哈哈......

出發嘞⇧

大廈保安員王先生問我去邊，我答"出發嘞..."。佢再問我去邊，我叫佢估下，佢諗咗一諗然後答我....."港珠澳大橋"。吓！又會咁都畀佢估到嘅？

13:14 由太子地鐵站往荔景站⇧

13:25 由荔景站轉東涌線往欣澳站 ⇧

13:38 到咗欣澳站搭扶手電梯上一層，轉左，行過對面月臺出站⇧

由現在開始，相片都加咗時間水印，方便大家知道實時拍攝時間。

13:39 往"A出口"出站⇧

13:41   出咗站就見到指示前往乘搭B5巴士(城巴)方向⇧

成人票價$5.80；長者$2.00 (城巴網站標示$2.90，但係我嘅八達通就顯示扣咗$2.00)

13:48   開車嘞⇧

14:09   到咗港珠澳大橋香港口岸嘞，總站到總站，全程冇塞車冇停站，約18分鐘⇧

14:19   過關嘞，完全唔駛排隊 ⇧

14:22 港珠澳大橋穿梭巴士(金巴)自助售票處⇧

港珠澳大橋穿梭巴士(金巴)係喺關口入邊，即係要過咗關先至搭到嘅。

14:25   唔係呀，原來長者票要喺隔籬售票櫃檯人手售票㗎。成人票先至可以喺自助售票處買㗎⇧

買飛要先決定去澳門還是去珠海，長者(65歲或以上)票價都係33蚊/張(單程)⇧

成人及12歲以下小童票價分別係   65蚊/張 及 半價/張(單程)。由早上6時至晚上12時嘅日間時段。

午夜後至早上六時嘅夜間時段則加收5元。

如果喺珠海口岸以現金購票返香港，只收取人民幣   (記住要帶呀)。

繁忙時間5分鐘一班，其餘時間約每10至15分鐘一班。夜間時段班次較疏，約每15至30分鐘一班。

港珠澳大橋主橋車輛通行費收費

港珠澳大橋管理局昨日（八月二十三日）公佈，經廣東省人民政府批覆同意，港珠澳大橋主橋收費站車輛通行費收費標準（每車每程）確定如下︰

小型客車（私家車、出租車）：150元人民幣
大型客車（過境巴士）：200元人民幣
穿梭巴士：300元人民幣
貨櫃車：115元人民幣
普通貨車：60元人民幣

14:33   前往乘搭巴士，B C區去珠海，DE區去澳門⇧

不嬲都以為珠海口岸梗係喺珠海，澳門口岸梗係喺澳門嘅啦......

錯！其實兩個口岸都係喺一個填海填番嚟嘅 珠澳口岸人工島上面，只不過珠海口岸喺人工島嘅北面，澳門口岸喺人工島嘅南面啫(見上圖 - 綠色/粉紅色部位)⇧

即係話，如果你去咗珠海口岸，忽然間想去澳門，行過去澳門口岸嗰邊過關就得。

亦即係話，無論你想去珠海或者澳門，出關後你都要再坐車離開珠澳人工島前往市區。