2017年7月12日星期三

牙痛

尋日無端端牙痛，搞到成睌冇得瞓。又唔係有爛/蛀牙吖，因為食嘢又唔覺得痛，總之右下顎大牙位置間唔中就有陣痛(即係"戚"下"戚"下咁痛，脈搏跳動咁痛囉)，亦都唔知係邊隻，大概係尾二嗰隻啩。

牙痛慘過大病，想唔理佢都唔得，今日拿拿林走去搵牙醫。咁啱政府喺今年7月1號起對65歲以上長者提供每年2千元嘅醫療券計劃，加埋依家嘅牙醫收費驚人，梗係搵間有參與醫療券計劃嘅診所啦。

搵咗幾間，發覺有啲要先預約，有啲就冇參加醫療券計劃。卒之喺西洋菜街/水渠道(始創中心對面) 搵到一間面積好細嘅牙醫診所(叫做兩層，但係地面加埋閣仔都冇200尺)，門口掛住"醫療券計劃"標貼，仲要由幾個牙醫共享。

大家亦可參照下列網頁找尋已登記醫療服務提供者名單：(不過好似唔係好詳盡

喎，睇勻26頁都唔見我睇牙果間嘅)

https://apps.hcv.gov.hk/SDIR/main.aspx?lang=zh

入到去，姑娘話醫生要到5:45分至返到，果時大概係下晝5點鐘，掛咗號無所事事就諗住返屋企先啦，就喺太子道/花園街紅綠燈前撞到阿賢。同佢講開，佢就話不如去睇洗衣街嗰個董立強啦，剝牙同洗牙都係收300蚊(不過佢今日再補充依個係兩年前嘅價)，佢都係幫襯佢。一嚟我已經掛咗號，二嚟我去到董立強果間診所發覺佢都冇參加醫療券計劃，所以最後都係去番先前嗰間。

講咗我嘅情況畀醫生聽，佢就先同我照X光，然後就話睇番張X光片我講嘅牙

冇乜大問題，應該唔會咁痛；反而話我有牙周病，上顎有隻牙蛀得都幾嚴重，提議我趁機補牙同埋洗牙，唔駛遲啲出問題時杜牙根又辛苦又貴；又話上下顎啲牙同埋條神經線，可能係做成牙痛嘅成因。

打咗麻醉針，跟住就落樓下等咗差唔多半個鐘等啲藥力生效....補完牙跟住就同我洗牙，仲話阿伯好叻咁洗牙都頂得蒲.....

埋單盛惠一千大元 - 補牙500、洗牙400、X光100、差唔多2個鐘嘅時間(包麻醉加埋等候時間都佔咗一半時間以上啦)。佢同我申請埋醫療券(係冇實體嘅醫療券㗎)，即係我只要畀張身分證佢就乜都搞掂。

然後佢就提議我覆診影多一張全部牙齒嘅X光，同埋洗第二次牙，因為我太耐冇洗，一次洗會比較辛苦。我心諗我係嚟醫牙痛嘅，依家駛咗成千蚊都唔知掂唔掂，你係唔係想同我一鋪清袋，攞晒2,000蚊？於是就話等下我隻牙痛唔痛先講啦......

簽咗張醫療券表格就走得，幾方便，又慳咗一千蚊嘞，哈哈！咦，藥都冇㗎，唔掂啲牙又痛起上嚟點搞？梗係問佢攞番啲藥以防萬一啦，佢見醫療券都開咗嘞，諗諗後就免費開咗依隻藥畀我。

我網上Google依隻藥"Mefenamic Acid"，發覺佢係非類固醇消炎止痛藥，服用劑量每次250-500MG，飽肚食。

Mefenamic Acid一啲相關網頁：

http://hk.apple.nextmedia.com/news/art/20050507/4867643

http://candybear98.pixnet.net/blog/post/34837691

http://sasabook.blogspot.hk/2009/03/blog-post_22.html

依次政府都叫做有番啲福利畀我啦，仲有冇呀？

2017年6月19日星期一

天際100 海港酒家

今日我大晒！乜唔係呀，全世界最大嘅互聯網公司Google都要改版面，祝我生日快樂喎。打開Google，首先出現"David，生日快樂！"字樣，依個時候千期唔好眨眼，因為話咁快就去咗下面第二個版面。Google咁識做抵佢發嘅。

嗱，冇呃你哋㗎，過左零時佢就變翻咁嘞......

今日既然大晒，梗係要睇下邊個識做啦。其實，6月15日嘅免費報紙AM730，

就睇到天際100

如果早啲發現，就叫大哥去啦，咪執輸嘛，啲飛幾貴㗎 (門票資料) ，長者都要過百蚊一張㗎。
初初都差啲擺咗烏龍，以為佢喺中環或者金鐘。睇清楚至知原來佢喺西九龍柯士甸道西1號環球貿易廣場（ICC）100 樓 (隔離就係西區海底隧道九龍入口)。

Google一下發覺最方便就係坐2蚊雞970城巴過海巴士(原價11蚊㗎)，

太子站上車，

西區海底隧道收費廣場站落車，

行2~3分鐘就到環球貿易廣場。970回程站就喺對面，遠啲，要行天橋過對面馬路搭。

去到大概3:00左右，畀咗張身份證售票靚女睇，就攞咗張免費門票同埋一聲"生日快樂"，跟住上一層電梯進場......

一進場，就經過一條時光隧道睇下昔日嘅香港(左右各有2-3版重複出現啩)，然後有工作人員為你拍照留念，相片喺觀景台攞，(原來相片要130蚊一張，我啲孤寒種梗係唔制啦，好彩佢哋用嘅係電腦相，尚未打印出嚟，冇嘥，啱嘅，環保嘛)。

跟住就搭升降機上去囉......

嗱，趁住我搭升降機上100層樓，你哋咪先了解一下天際100囉。大家可以先睇下下面嘅 Youtube視頻：

1. 2011-04-13 東張西望(天際 100) (2:32min)

2. 28-03-2011 陳嘉欣全港最高觀景臺天際 100 (1:41min)

3. Sky100 Observation Deck 天際100 (2:20min)

4. 20110324 「天際100」鳥瞰港九 (2:41min)

第3個視頻條友真係好得閒兼且冇蝕抵啫，由日睇到夜。咁都好，畀大家睇埋日夜唔同景色。

睇晒上面嘅視頻要10分鐘，但係100層樓大概1分鐘左右就到，出升降機就係觀景台嘞。可能今日係星期一，又唔係假期，所以遊人唔算多，我睇到有一支國內採訪隊在拍攝。觀景台內有多個望遠鏡可供使用，盛惠20蚊一次。

當然，少不了售賣紀念品嘅攤位同埋小食部啦。比較有特式嘅係VR虛擬實境......

首先，我發現地面有一個圓形圖案。當我走埋去睇下係乜東東嘅時候，一位靚女服務員走埋嚟好客氣咁問我駛唔駛幫忙。然後佢叫我喺手機安裝佢哋一個叫做Sky100嘅app。打開個app，對準地面嘅圓形圖案，虛擬嘅ICC大廈就會喺你部手機出現，我梗係乘機走埋去叫佢同我影翻張相留念啦......

依類觀景台我覺得比較適合外地遊客，我哋香港人喺山頂乜都睇過啦，坦白講冇乜新鮮感，叫做曾經到此一遊囉，即係我成日講嘅"我都去過啦"呀，哈哈！

我見到有人叫一個靚女工作人員同佢影相，我咪唔執輸叫佢同我影翻張囉。

依幾日一直都落雨，但係我參觀期間天氣同埋視野還可以，算唔錯喇，個天都算畀翻的薄面。四點左右就歸心似箭嘞，點解，趕下場嘛......七點半出席為我而設嘅生日宴會囉，哈哈！

生日宴會喺將軍澳新都城一期海港酒家。出席嘅家族成員包括：大哥、我、阿棠、秀雯、阿龍、淑賢、阿添、阿禧、Teresa九人。

食咗乜？睇下張菜單咪知囉......

主角4.5斤嘅阿拉斯加長腳蟹(HKD188/斤，即HKD846)唔錯喎，新鮮爽甜，對辦。

佢哋話條東星斑就比較差，早知叫條沙巴龍躉好過，仲平400蚊添。埋單盛惠HKD2168，算抵食啦，多謝多謝，感恩！

其他菜色：

芝士焗蝦球伊麵

蒜蓉粉絲蒸元貝

花膠響螺頭湯

鮮竹魚腐浸勝瓜

招牌燒鵝皇半只

仲有壽包、紅棗糕送㗎。秀雯同海港個店長熟嘛，依啲著數少不免啦。

仲有仲有，多謝大哥、阿棠秀雯阿龍阿賢等、阿拉嘅大利是，又食又拎，仲唔係大晒？

2017年5月17日星期三

港鐵股東周年大會

今日去同馬時亨開會，佢要向我匯報...... 唔駛擘大對眼喎，我話去開港鐵股東周年大會咋，哈哈！

唔講你哋唔知，買咗40幾年股票，依次係我第一次參加股東周年大會咋。為乜依次咁熱心呢？且聽我慢慢道來......

衰嘅原因：因為聽人講得多，參加依啲會有得食又有得拎㗎，衰貪心囉

唔衰嘅原因：因為都係想去見識下嘅

其實我依個股東好失禮，揸住1,136股咁大把，名副其實嘅小股東也。但係唔好睇小佢呀，佢係我有史以來最賺錢嘅股票嚟㗎。股票喺2000年10月5日以港幣9.38嘅上市價用白表投番嚟嘅，到今日2017年5月17日嘅價錢係港幣49.10。我係唔係好叻呢，但係如果同你哋講我依家仲有90幾蚊嘅匯豐(現價港幣68.70)同埋廿幾蚊嘅電訊盈科(現價港幣4.51)果陣就會同我相對無言，然後講原來你真係好叻喎...... 哈哈！唔怕，二嫂嘅師傅話齋，實行同佢鬥長命。

股東周年大會喺九龍灣國際展貿中心6樓舉行，時間係11:30。

因為驚唔熟路同埋又驚辦手續需時，總之依家心血少，乜都驚餐懵。倒塔咁早(9:55)就起程。從太子到九龍灣搭地鐵大概20分鐘，A出口，按指示朝九龍灣國際展貿中心方向走，上2部扶手電梯，然後沿德福商場步行大概6分鐘到車站乘搭免費穿梭巴士(MegaBox同埋EMax九展都係喺依度搭嘅。)

去到車站已經有人排隊，但係亦見到幾架巴士等緊上客，所以陣間就上到車嘞，車程大概6分鐘。10點半左右就到咗九龍灣國際展貿中心嘞。

搭笠上6樓，原來有唔少人已經到咗。之前已經問過，持有實股(即股票持有人以本人為名) 嘅投資者可以憑身份證就可以登記進場。出咗笠果然見到好多工作人員、保安等熱誠招呼，其實進入九龍灣國際展貿中心就已經見到佢哋，初初仲以為乜誰嚟咗添。工作人員引領我到負責登記嘅同事(有十幾二十個)辦理登記。畀個身份證佢，佢用電腦核對資料，1~2分鐘就搞掂。跟住佢就畀我一個電子投票機、一張電子投票機使用說明單張、一張火警疏散圖同埋一個環保袋。