山頂行大運(經香港大學)

今日係2019年2月10日，趁住天氣冇咁熱(係呀，你冇聽過年初四錄得25.1度破高溫紀錄，第一次新正頭開風扇咩？)，決定去山頂行大運嘞。今年唔同舊年，今年揀咗經香港大學行山路上山。點解咁叻識路呀？有[香港大學站] 盧吉道欣賞香港最美教路嘛。

12:45出門，搭地鐵由太子站往中環站，然後轉港島線往香港大學站。

A2出口，搭升降機往香港大學(梗係要搭升降機啦，全港最大和最深，高約23層樓嘅洞穴式車站喎，點行呀？)

香港大學站幾有特色，一條走廊兩邊掛有圖片介紹大學歷史及文化。↓

出咗升降機後，就會睇到黃克競樓......↓

往前直行到尾，落樓梯就會見到中銀ATM機同埋大學飯堂嘞。↓

大學飯堂啲嘢抵唔抵呀？睇唔到？點選張相一下，然後用兩隻手指放大佢咪睇到囉。↓

左手方向上斜坡。睇下個鐘，時間係13:45。↓

 然後由依條石級直上......↓

見到依個指示牌就靠左行......↓

出咗石級就係旭龢道，過馬路然後又再上石級......↓

石級出口就係克頓道，靠右上斜路......↓

由依度開始一路上山嘞。整段克頓道山路都係依啲石屎路......↓

依度有廁所，有需要就去方便一下啦。↓

又係靠左走......↓

指示牌寫住上山仲有1900米，落山仲有900M(每100M都有依啲指示牌)。要解釋一下：依段山路全長2800米，但係，其實去到1100M左右已經上到山頂，唔駛再行得咁辛苦，因為跟住就係山頂盧吉道"山頂行大運"嗰後半段平路嚟嘅。↓

嚟到依度又係靠左行......↓

睇到依個指示牌同埋側面嘅廁所代表苦難就快完結(唔駛1分鐘就到"山頂行大運"嗰後半段平路嘞)。沿途冇乜特別風景可供欣賞，不過空氣就梗係"正"，同埋夠晒運動量啦。↓

登登登凳......認唔認得呀？依度咪係山頂囉。睇下個鐘，15:05，即係由大學飯堂13:45開始行，行咗1個鐘頭20分鐘。梗係慢啦(見後記)，不過，點都快過烏龜啩。↓

都話咗文人多大話啦，都唔明點解會叫"盧吉飛瀑"嘅，山坑水就山坑水啦。↓

登登登凳......卒之終點在望嘞。係呀，山頂好大霧。睇下個鐘，15:35。即係，"山頂行大運"後半段行咗20分鐘。↓

山頂廣場要喺今年夏天至會重開......↓

睇見排山頂纜車條人龍，我都唔駛考慮啦，搭C15巴士又平又唔駛點排隊。↓

後記

步速比較：(每段視頻都不長，但可能要稍稍等候視頻下載)

外國人

後生仔

老嘢

所以，如果有人話從克頓道上山頂需要3~40分鐘或者1小時20分鐘都唔好話人呃你呀😊。

算啦，到最後大家咪一樣去到山頂，哈哈！

郵輪碼頭

噚日下晝去咗郵輪碼頭......唔係遊埠呀，"行"去郵輪碼頭咋。↓

郵輪碼頭最主要嘅對外交通係依條橋 - "啟德橋"。依條橋位於"香港兒童醫院"旁邊。(紅色嗰座係Mega Box)。

由上橋開始，行到郵輪碼頭大概25分鐘。↓

過咗橋就見到依個牌，依度屬於九龍城區。↓

時不時都睇到啲跑友喺度練習跑步。好似我咁嘅遊(行)人，好似就係得我一個傻佬。↓

郵輪碼頭：

最底層LG：巴士站、的士站、行李大堂

L1：停車場

L2：酒樓、餐廳、商店、輪候大堂、海關等

天台：觀景平台、花園等↓

聯邦酒樓 - 客人唔多，疏疏落落，但係我就聽到啲酒樓女工傾偈："今日都算多客囉"。

‎郵輪碼頭2013年6月開張，唔覺唔覺都開咗5~6年，我睇佢哋真係唔易做。↓

輪候大堂

郵輪碼頭有兩個輪候大堂，依個係其中一個。↓

花園唔錯㗎，乾淨、環境清淨、空氣好，所以我見啲後生仔女、阿爸阿媽帶埋啲仔女嚟遊玩嬉戲。↓

卒之見到一隻郵輪，"Westerdam"。上網查下，依隻郵輪屬於4星級，82,348噸，2004年首航。

同當今最大嘅郵輪，"Symphony Of the Seas"比，好對唔住，228,081噸，差唔多1隻當佢3隻。

就算歷來訪港最大嘅郵輪"海洋量子號" Quantum of the Seas，168,666噸，排名世界第7，都1隻當佢2隻。↓

https://www.youtube.com/watch?v=ZfkNK8jhJwk

紅色部分就係觀塘海濱長廊(又稱觀塘海濱花園)，喺觀塘碼頭隔離。全長約1公里，2015年5月啟用，前身係觀塘公眾貨物裝卸區。↓

面向鯉魚門

天台花園面積唔細，全長約850米(來回一個圈，影下相，欣賞一下美景，大概都要30分鐘)↓

面向九龍城(一望無際嘅爛地，真係冇眼睇)

環保單軌系統、啟德體育園、新急症醫院、稅務大樓等只聞樓梯響，影都冇。↓

咁樣睇啟德橋好似好近Mega Box，步行4~5分鐘應該就到，無奈隔住啲地盤，全部攔住，唯有兜大圈行，無端端用多十幾分鐘至到。↓

Mega Box有Live band賀年喎。↓

喺麥記嘆下午茶，望過對面有一座以前未見過而又幾有特色嘅建築物，原來係叫"零炭天地"。不過要預約參觀，所以稍為睇一下就走。↓

喺Mega Box地庫搭免費穿梭巴士往德福廣場返歸。↓

大棠賞紅葉

今日係2019年1月10日星期四，老三又趴趴走嘞。

去邊？(元朗)大棠賞紅葉囉。

11:15分鐘出門前往太子站，乘搭地鐵到美孚，然後轉西鐵往元朗朗屏站(唔好搞錯，唔係元朗站呀)。11:59到朗屏站，B出口然後朝B2方向走，⇓

直行到尾，⇓

往下望就會見到K66巴士站嘞 (即係要落天橋啦)。⇓

首先講下長者有著數。原來搭地鐵，轉西鐵，再轉K66(屬於港鐵路線)，長者全程都只係需要支付2蚊咋⇓

(即係今日交通費合共4蚊)，你話抵唔抵？正啦👍！

仲有，我個爛鬼紅米Note 5有個"全景"功能，文中相片如果係廣角嘅就係用佢嚟影嘅，效果唔差喎。

今日係閒日，第一架K66都坐滿人，第二架就有位坐嘞，等咗唔算耐，十零分鐘左右啦，行車時間大概30分鐘，都唔知點解，K66元朗市區內個個站都有人排隊上車，出咗市區就快好多嘞。到咗尾二站(即係"大棠山路站"落車)，⇓

往車尾方向行，就會見到指示牌"觀賞紅葉"，⇓

同埋唔少人同你一齊行啦。

12:45分鐘左右開始上山嘞。全程大概需時1小時08分鐘左右，講明係大棠山，即係要上山啦。難唔難走？全程都係石屎車路，一邊/兩邊係行人路，基本上唔難行，但係要上山，尤其係最初40分鐘左右比較斜。

民以食為天，醫下個肚先，價錢一般啦。⇓

又或者幫襯依間吖。⇓

土豪梁福元辦事處原來喺依度。⇓

土製波蘿？⇓

K66喺特別日子有特別班次嚟到依度㗎，⇓

可以慳番大概15分鐘上山路程，優待啲？

沿途發覺唔少人踩單車上山，⇓

依家啲單車有波，上山都冇問題，有啲路段其實都幾斜㗎，厲害！

下面17秒視頻可能需要小小時間下載然後才能播放。⇓

咁巴閉？唔同月份有唔同花睇？係真唔係呀？⇓

喺依度我見到有啲後生仔女沿石階去燒烤場地，唔知同下面果個燒烤場地是否同一個呢？⇓

好大嘅燒烤場地呀！⇓

嚟到依度，距離終點"楓香林"大概半個鐘左右啦，即係行咗一半嘞。

行前小小，就會見到有一度閘，一個更亭，同埋一塊上面寫住所有車輛、電單車不得進入嘅警告牌，即係所有私家車、電單車(單車就可以)等都要停泊喺隔離嘅停車場。的士亦都要係依度落客嘞。⇓

更亭護衛員話其實如果有四人同行，搭的士就好抵，廿蚊左右(即每人5蚊)就唔駛行一段比較辛苦嘅斜路，慳番差唔多40分鐘。

行到依度，其實已經開始見到有啲零零星星楓樹嘞，亦都見到啲廿四孝父母推著嬰兒車帶埋佢哋啲寶貝賞紅葉添。⇓

依個就孝順嘞，陪伴高齡母親上山賞紅葉，旁邊嘅好心單車哥哥睇到老太有啲辛苦就叫佢哋唔好急，慢慢嚟，行到攰就坐低休息下。⇓

估計佢哋應該自己有車或者搭的士落山，否則咁行法真係落到山腳都天光啦。有個老太就唔同嘞，坐係輪椅，有個工人(唔知係菲傭還是印傭嘞)舒舒服服咁推佢趴趴走。

13:51嚟到依度終點在望嘞，⇓

往左轉就進入楓樹密集區(相對啦，同加拿大比實畀阿妹笑到面黃啦)。欣賞紅葉時間其實很短，大概1-2個月時間，而且，喺香港出現嘅紅葉並非楓樹嘅楓葉，而是來自楓香樹。由於兩者嘅樹葉外形相近，且會在秋天變成紅色，所以香港紅葉常被誤以為係來自楓樹。其實，楓葉一般為掌狀五裂，而楓香樹樹葉多為三裂掌狀(參考：http://www.hkhselderly.com/tc/travel/scenic/204)

鄧凳凳凳...... 依度就係大棠楓香林嘞。⇓

前面應該仲有啲楓香樹嘅，⇓

但係睇嚟都唔會有乜驚喜，就唔行嘞，開始打道回府，睇下個鐘，14:21。

大概15:30返到山腳K66巴士站(就喺來程對面)。⇓

嗱，依的就係我攞返嚟嘅楓香樹樹葉，⇓

同加拿大的楓葉係唔同㗎。⇓

參考網頁：

http://www.yl.hk/TaiTongRedLeaf/

僅此一副對聯，便寫盡了人生 (轉載)

近日讀到一副對聯，可謂功力深厚，堪稱「奇聯」。

上聯：若不撇開終為苦

下聯：各能捺住即成名

橫批：撇捺人生

不得不說，這副對聯很有深度！

「若」字的撇如果不撇出去就是「苦」字； 

「各」字的捺筆只有收得住才是「名」字； 

一撇一捺即「人」字。

是啊，水無兩點難結冰，一撇一捺才是人！

人字兩筆

一筆寫得到，一筆寫失去

人生在世，沒有永久的得到，也不會永遠失去。得失總是相伴而行的。你在得到的同時也在失去，得失之間，莫要太過計較。

一筆寫過去，一筆寫將來

彷彿就是一眨眼，人生已過半。前方是嚮往的將來，回首是昨天的記憶，而今天就在腳下。昨天已回不去，明天依然未知，唯一能把握的就是今天。

一筆寫快樂，一筆寫憂愁

有快樂就會有憂愁，兩者是相對的。憂愁又何嘗不是人生的寶貴經歷。只有經歷過的人才不會遺憾在這世上走一遭。

一筆寫自己，一筆寫愛人

一生之中，若遇到一人攜手白頭，是件多麼溫暖而美好的事情。感情之所以被歌頌，就是因為它不容易得到，如果你已有幸得到，且行且珍惜。

一筆寫順境，一筆寫逆境

沒有一帆風順的人生路，也沒有滿布荊棘的人生路，有逆境就會有順境。只有咬牙堅持了，才能知道：山重水複疑無路，柳暗花明又一村。

一筆寫朋友，一筆寫對手

人生難得有好友，人生也難得有對手。有時候對手才是最瞭解你的那個人，不要抱怨對手的強大，因為只有強大的對手才能讓你更強大。

一筆寫執著，一筆寫放下

很多事情是你堅持之後得到的，苦盡甘來的會讓你更懂得珍惜。但是你也要明白有些事情卻是無結果的，努力過就夠了，人要拿得起，放得下。

凡世間之事，撇開一些利益糾結就不苦了；看方寸之間，能按捺住情緒才是人生。