尋日無端端牙痛，搞到成睌冇得瞓。又唔係有爛/蛀牙吖，因為食嘢又唔覺得痛，總之右下顎大牙位置間唔中就有陣痛(即係"戚"下"戚"下咁痛，脈搏跳動咁痛囉)，亦都唔知係邊隻，大概係尾二嗰隻啩。
牙痛慘過大病，想唔理佢都唔得，今日拿拿林走去搵牙醫。咁啱政府喺今年7月1號起對65歲以上長者提供每年2千元嘅醫療券計劃，加埋依家嘅牙醫收費驚人，梗係搵間有參與醫療券計劃嘅診所啦。
搵咗幾間，發覺有啲要先預約，有啲就冇參加醫療券計劃。卒之喺西洋菜街/水渠道(始創中心對面) 搵到一間面積好細嘅牙醫診所(叫做兩層，但係地面加埋閣仔都冇200尺)，門口掛住"醫療券計劃"標貼，仲要由幾個牙醫共享。
大家亦可參照下列網頁找尋已登記醫療服務提供者名單：(不過好似唔係好詳盡
喎，睇勻26頁都唔見我睇牙果間嘅)
入到去，姑娘話醫生要到5:45分至返到，果時大概係下晝5點鐘，掛咗號無所事事就諗住返屋企先啦，就喺太子道/花園街紅綠燈前撞到阿賢。同佢講開，佢就話不如去睇洗衣街嗰個董立強啦，剝牙同洗牙都係收300蚊(不過佢今日再補充依個係兩年前嘅價)，佢都係幫襯佢。一嚟我已經掛咗號，二嚟我去到董立強果間診所發覺佢都冇參加醫療券計劃，所以最後都係去番先前嗰間。
講咗我嘅情況畀醫生聽，佢就先同我照X光，然後就話睇番張X光片我講嘅牙
冇乜大問題，應該唔會咁痛；反而話我有牙周病，上顎有隻牙蛀得都幾嚴重，提議我趁機補牙同埋洗牙，唔駛遲啲出問題時杜牙根又辛苦又貴；又話上下顎啲牙同埋條神經線，可能係做成牙痛嘅成因。
打咗麻醉針，跟住就落樓下等咗差唔多半個鐘等啲藥力生效....補完牙跟住就同我洗牙，仲話阿伯好叻咁洗牙都頂得蒲.....
埋單盛惠一千大元 - 補牙500、洗牙400、X光100、差唔多2個鐘嘅時間(包麻醉加埋等候時間都佔咗一半時間以上啦)。佢同我申請埋醫療券(係冇實體嘅醫療券㗎)，即係我只要畀張身分證佢就乜都搞掂。
然後佢就提議我覆診影多一張全部牙齒嘅X光，同埋洗第二次牙，因為我太耐冇洗，一次洗會比較辛苦。我心諗我係嚟醫牙痛嘅，依家駛咗成千蚊都唔知掂唔掂，你係唔係想同我一鋪清袋，攞晒2,000蚊？於是就話等下我隻牙痛唔痛先講啦......
簽咗張醫療券表格就走得，幾方便，又慳咗一千蚊嘞，哈哈！咦，藥都冇㗎，唔掂啲牙又痛起上嚟點搞？梗係問佢攞番啲藥以防萬一啦，佢見醫療券都開咗嘞，諗諗後就免費開咗依隻藥畀我。
我網上Google依隻藥"Mefenamic
Acid"，發覺佢係非類固醇消炎止痛藥，服用劑量每次250-500MG，飽肚食。
Mefenamic Acid一啲相關網頁：
依次政府都叫做有番啲福利畀我啦，仲有冇呀？
